Thursday, June 4, 2015

പകർന്നാട്ടം


എത്ര എഴുതിയിട്ടും 
എത്ര കോറി വരച്ചിട്ടും 
തെളിയാത്ത മഷിയിൽ 
ഇപ്പോഴും കുരുങ്ങി കിടക്കുന്ന ഒരു വാക്കുണ്ട്...
വഴി വിളക്കിൽ തെളിഞ്ഞ 
ഓർമ മരത്തിൽ നിന്ന് 
അതിനെ വിടർത്തിയെടുത്ത് 
പലകുറി കളഞ്ഞു നോക്കിയതുമാണ്...
എന്നിട്ടും വേരുകളിൽ പറ്റിയിരിക്കുന്ന 
പായൽ പിടിച്ച പുസ്തകത്തിൽ നിന്ന് 
വക്ക് പൊട്ടിയ അക്ഷരങ്ങളായ് 
ഇടയ്ക്കിടെ അത് എത്തി നോക്കുന്നുണ്ട്.
പിന്നെ പിന്നെ,
നീളം കുറഞ്ഞു വരുന്നൊരു വാക്യമായി 
ഇടയ്ക്കിടെ അത് മൊഴി മാറ്റം ചെയ്യപ്പെടുന്നു 
ഒടുവിൽ 
എഴുതാത്തതിനും പറയാത്തതിനും ഇടയിലെ അർദ്ധവിരാമമായ് 
കടലാസ്സിലേക്ക് ഒരു വസന്തത്തിന്റെ 
പകർന്നാട്ടം നടത്തുകയും ചെയ്യുന്നു.

( Photo: KC )

1 comment:

  1. എഴുതാത്തതിനും പറയാത്തതിനും ഇടയിലെ അർദ്ധവിരാമമായ് പകർന്നാട്ടം

    ReplyDelete